 |
Questa pagina è stata trascritta, formattata e riletta. | |
Testi friulani: Secolo XIX.
321
«trist, perdon.» «Jevo, i rispuint il pari, chi gi imbrazi.» E senza lassai di dì uno peravolo solo, ai salto da pruf di lui, lu chiappo a braz a cuel, e lu busso e lu torno a bussà, e lu bagno cullas lagremos. Po dopo, voltat ai servitors che erin biel a lì daur di lui, jur disè: «Lait in pressa, davrìt lu gno grand armar e puartait ju ping biei vistiment[s], parcè chi hai da vistì lu gno fii. Lait in tal chiot, dispeait da trisef lu pin gras vigiel, mazzailu, squarteailu, fait un bun past di nozos e di sagro: farès gnocs, chialsons, losagnos, joto di risis, rost, specs sulla gradelo, crostoi, frittulos e sopos.
«Prechiàt la tavolo in ta stuo, jo uee soi dutt in t’uno legrezo parcè cest fii l'ero muart e a l'è risuscitat, lu vevi piedùt e lu hai chiatat.»L'orden ven pandut. Van dugh a ghioldi, a parechià pal gran past di sagro e di nozo, tant ju servitors, che las voros, che ju lavoradors del Sior Paron.
Lassin di seà e di voltà lu reonaz, di spandi las solz e di trespedaa ju remìs, di implantaa lu midili da medo. In menuus implàntin las tajos e la lisso al cridà, bauf! dal lor condutor. Corrin viers la bergerio a pojà lu sapìn, lu angheir, la lado, ju grifs; lu scotton lasso di fa la polento, ju pastors lòghin las vachios, las pioros, las chiaras: van ta casèro e tal celàr, pàrin da bando lu musso culla gran chialderio pleno di lat, parin ben denti lu tappò tal sizzal parcè cal no si spandi lu siz; voltin lu formadi e la scueto sul tabio; implàntin la fedario e di gnavà la menado da pegno, e dutg corrin viers la chiaso del bon paron uzzinant da legrezo.
Las voros e las mamolos mettin su ju biei cass e fazzoletz, giàvin las darbedos e metin ju scars e lu grimal ros. Ju fameis e ju zornadeirs si viestin anchio lor biei biei colla robo das fiestos, e ju maridatz coi abetz nuvizzai. Qualchidun e qualchiduno dai ping morbinoos van a balaa tal stali là ca si suno lu viulin e lu liron e si balo minuvetz, sbòlzeros, e sclavos tant ca si voul. Qualchidun chianto bielos raganizzos ta cort e sot ju balcons; qualchidun che san fa las bielos smorfios, stan a chiacherà cul Sior Paron e cul so fii, intant ca si fas lu past. Eh! ce biel vedee chei cogus e ches cusinarios e ches mamolos a fa dut biel in chiaso, e a parechià lu mangià e ju golosetz.
Sulla lars art un biel fouc no migo di legnos tarondos, o di sclausers, o di bruschios, ma di legnos di vespol sclapados, secchiados sul legnar cas ardevo como chiandelos e fasevan un biel borostai; ta gran rimìno bol la chiar; ta techio lu togh di vigel; sullas gardelos ai fumo iu specs, in somp pizouc al cor attor lu rost. Menio, sul desc, sbat ju cocs par fa las fritulos e las soppos indorados. Marto, sul taulèir, culla mescolo distiro la pasto di forment par fa crostui, fritulos, gnocs e chialsons e losagnos e pizzacocoi. Marìo, culla ingernario biel novo no vial ingerno la stuvo, saldo con un coni ju peis da lunghio tavolo e distiro sù ju biei mantij e mett sore ju tonts di stang, las furchitos e sedons d’arìn. Par rivaa sulla musolero met lu bredol sot ju peis, e tira jù ju muzoui. Nissun ha padim e dutg han pouro di ingludaa alc e di no fa content lu paron e ju invidatz.
