 |
Questa pagina è stata trascritta, formattata e riletta. | |
286
Joppi,
h.
Vo prisonīrs dolenz e disperāz,
Vo galīoz, [e] vo sclāz in chiadène
Dal aguzin batūz e tormentāz,
Ch’un mufōs pan biscot us dà di cene,
Vo di fortezis pedoglōs soldaz
Co fais chel chivalà cun tante pene,
Cul miò mal consolāsi, che maiōr
Stimarēs (so i pensās) lu miò dolōr.
Iò vīf gram in preson stret e leiāt
Fra dōs strezis che mai i pensi issij,
Di chēs soi d'ogni bande inchiadenāt,
Amor cu iè l'aguzin mi fās patì,
Lu biscot ch’ò mi pas è crudeltāt,
Di lagrimis bagnāt iò 'l uei pur dij,
Di Tine no, ma dal miò trist destin,
De me sorte crudēl cu non ha fin.
S’iò ami sepi amōr e s'i uei ben
E s’iò brami vedè la so beltāt,
Se mi ha robāt lu cūr dret fūr dal sen
Pur feliz senze cūr un timp soi stāt,
Un timp quand che discori e vedè a plen
La podèvi e clamà: Tine pietāt;
Ma cumò senze iè, iò peni a tal
Che la muart stimares un manco mal.
Iò voi di sù e di iù malabiant
E lì no chiati mai lu miò cunfuart,
Chel borc cu mi solève plasè tant
Cumò mi fas vignì i sudors di muart:
A chì steve 'l miò ben, iò voi pensant,
Borc d'ogni miò pinsīr quïete e puart,
Ma cumò prif di Tine ahimè ch'al è
Un infiar spaventōs al miò parè.
No si viōd ai balcons plui che beltāt
Chu non ha pār e chu mi sta in tal cūr
Di vedèle: o mischin, cui mi ha privāt!
Cause che disperāt iò peni e mūr;
No za di Tine sden ni crudeltāt
Che iè non è crudēl ben soi siūr,
Amōr sarà fuars stāt lu traditor
Par gioldè dal miò mal, dal miò dolōr.
