Pagina:Joppi - Testi inediti friulani dei secoli XIV al XIX, 1878.djvu/111

Testi friulani: Secolo XVII.

285



e.

La me madresse è dute faropade,
      Iò crōd ch'amōr vebi cun un bolzon
      Fat chēs cavernis par sta chest giaton
      Dentri sqindūt a sassinà a la strade.
Ma po, se ben che iè cusì segnade
      D’amōr, o par dij 'l vēr, dal uaruelon,
      E no reste però di parè bon
      E no reste però d'iestri garbade.
E ce plui dolz è d'un piètin di mīl?
      E ce plui biel d'un abit ricamāt?
      E ce plui bon d'un formadi zintīl?
E pur ognun di lōr è foropāt:
      Ce caad a dij! al saref brut lu cīl
      S'al no fos dut di stellis uaruelāt.


f.

Bàrbure, vite me, iò murirès
      Cert s'tu tuelès un fari donge te:
      Iò mi consòli però un pōc parcè
      Che no pues credi mai che tu 'l tuelès.
Ma se tu fos risolte e tu vuolès
      Un fari par marīt, deh tuolmi me
      Che par to amōr, iò ti zuri la fè,
      Puarti une farie di continue aduès.
La fusìne è 'l mio pet che simpri al art,
      Foij iu sospirs, l'incùdin è'l mio cūr,
      Lu martiel è 'l martiel ch'ai bat su fuart.
Ste voie ha di durà insin ch'io mūr
      Se il fiar di to nature in qualchi part
      No si mulificas cu è cusì dūr.


g.

O chiative fortune o sorte mè,
      O passion che iò provi o gran torment,
      Ni favelà no pues, nè plui vedè
      La mè Tinutte biele e 'l miò content:
      Chiadi lu mar e mont e ce cu iè
      Che plui no mi pò fa gram e dolent:
      Iò soi prif d'ogni ben, d'ogni speranze
      E une mìsare vite sol mi avanze.