Pagina:Hypnerotomachia Poliphili.djvu/3


formidabit cum tuam subiverit, et frequentius ab aliis legetur, qui a te lectus putabitur, et ego ex parte aliqua assecutum me, quod optaveram sperabo. Vale et Crassos mecum tuos tuis annumera.

Ioannis Baptistae Scythae carmen ad clarissimum Leonardum Crassum artium ac iuris Pontificii consultum.

Hic mirabilis et novus libellus
Aequandus veterum libris avorum,
Quo, quicquid dat in orbe vita toto
Rarum et nobile, fertur ac refertur,
Tantum fert tibi Crasse gratiarum,
Quantum Poliphilo tulit parenti
Vitam Poliphilus dedit, dedisti
Vitam tu quoque, sed necem repellis.
Nam cum conditus in situ iaceret
Lethen iam metuens sibi propinquam,
Das hunc gentibus omnibus legendum,
Nec tu sumptibus, aut tuo labori
Parcis, sed melior parente natum
Proiectum gremio tuo levasti.
Olim bis genitum ferunt lyaeum.
Sic nunc contigit huic libro, refertque
Patrem Poliphilus, Iovemque Crassus.

Anonymi elegia ad Lectorem.

Candide Poliphilum narrantem somnia lector,
   Auscultes, summo somnia missa Polo,
Non operam perdes, non haec audisse pigebit
   Tam variis mirum rebus abundat opus.
Si gravis et tetricus contemnis erotica, rerum
   Nosce precor seriem tam bene dispositam.
Abnuis? ac saltem stylus et nova lingua novusque
   Sermo gravis, sophia se rogat aspicias.
Id quoque si renuis, geometrica cerne, vetusta
   Plurima niliacis disce referta notis.
Hic sunt pyramides thermae, ingentesque colossi
   Ac obeliscorum forma vetusta patet.
Hic diversa basis fulget varieque columnae
   Illarumque arcus, zophora, epistylia,
Et capita atque trabes, et cum quadrante coronae