Questa è per onor mio la sesta volta,
Che me presento a sta benigna Udienza,
L’ultima sera a ringraziar chi ascolta,
E chi soffre la nostra insufficienza.
Ah! se avesse dal fren la lengua sciolta
Vorria stasera domandar licenza
De poder dir quel che non ho mai dito,
Ma ogni sfogo per mi saria un delito.
Compatirne, ve prego, in carità
Se confusa me vegno a presentar,
Perchè dopo aver tanto sfadigà
Villanie no me par de meritar,
Da mi, da tutti nu s’ha procurà,
El mestier con modestia esercitar,
E pur zente ghe xe (ne so dir come)
Che i Attori strapazza e stampa el nome.
Del poeta no parlo; el soffre, el tase,
Perchè a lu no i ghe fa nè ben nè mal;
El Pubblico el respetta, el se compiase,
Che dei discreti el numero preval.
Solamente el se lagna, e ghe despiase
Che se diga che el guasta la moral,
E che penne lo scriva venerande
Con parole sporchissime e nefande.
Basta, lassemo andar ste cosse odiose
Capace ogni omo onesto d’irritar....
. . . . . . . . . . . . . .
Tanto del vostro amor, tanto me fido,
Veneziani cortesi e de buon cuor,
Che nell’anno, che vien, spero e confido
Egual prosperità, se no maggior.
Avvilirne i voria, ma me ne rido,
Ghe vol altro che Fiabe a farse onor,
E maghi, e strighe e satire e schiamazzi,
Le vol esser Commedie e no strapazzi.
. . . . . . . . . . . . . .
