 |
Questa pagina è stata trascritta, formattata e riletta. | |
| CHI LA FA L'ASPETTA | 445 |
Gasparo. Ma come gierelo sto mio fradelo? Grando, piccolo, grasso, magro, come gierelo vestio?
Oste. No so, no m’arecordo ben. Grando no certo; gnanca tanto piccolo. Me par magretto... So ch’ai gh’aveva un tabarro de scarlatto, mi no so altro.
Gasparo. (No crederave mai ch’el fusse Lissandro!)
Oste. Me comandela altro?
Gasparo. La vostra bona grazia. Patron.
Oste. Son ai so comandi, de dì e de notte, co la vol; e un’altra volta, se no la vol che so consorte lo sappia, la me avvisa per tempo, e la lassa far a mi. (parte coi Garzoni)
SCENA XI.
Gasparo, il Caffettiere, poi Riosa.
Gasparo. Eh vatte a far squartar anca ti. Più che ghe penso, e più gh’ho sospetto sora Lissandro. Ch’el m’abbia fatto elo sta baronada? No l’è baronada, se volemo, ma la xe un’insolenza: tanto più che m’ha tocca quel siropo de mia muggier.
Caffettiere. Patron, sior Gasparo.
Gasparo. Cossa gh’è, sior?
Caffettiere. Son vegnù a incontrar se la pagherà ella quei sette caffè che ho porta qua ancuo.
Gasparo. Mi no so gnente. Chi ve l’ha ordenai?
Caffettiere. So ch’ella no sa gnente, e son vegnù qua per questo. Me li ha ordenai sior Lissandro.
Gasparo. Gierelo qua Lissandro?
Caffettiere. Sior sì, no alo disnà qua in compagnia?
Gasparo. (Oh bona! ho scoverto tutto). (da sè) Saveu chi ghe giera qua a disnar?
Caffettiere. Sior sì, li conosso tutti a un per un. Ghe giera anca una massèra vestia da lustrissima.
Gasparo. Conteme, conteme. Ma no vorria che vegnisse mia muggier. Andemo, ve pagherò, e me contare per strada. (in atto di partire, ed il Caffettiere l’aspetta alla porta)
