 |
Questa pagina è stata trascritta, formattata e riletta. | |
| CHI LA FA L'ASPETTA | 439 |
Gasparo. Mo per cossa? Co vu no ghe gieri? Co mi giera impegnà via...
Tonina. Eh lasseme star, caro vu, coi vostri impegni, lasseme star. (cavandosi la vesta)
Gasparo. Tonina, in verità, dasseno, parè matta.
Tonina. Portè de là. (getta la vesta a Riosa con dispetto)
Riosa. (Oh, se la va in cusina, poveretti nu! Cossa mai alo fatto el paron stamattina!) (da sè, parte)
Tonina. Refudar un omo de quella sorte, per andar... per andar...
Gasparo. Da mio compare Bernardin.
Tonina. Da vostro compare Bernardin?
Gasparo. Siora sì, e avemo sera el contratto d’una partia de quattro balle de canevi.
Tonina. Caro vu, no me fe parlar.
Gasparo. Cossa voressi dir?
Tonina. Voggio dir che ho manda da sior Bernardin, e che no ghe gieri.
Gasparo. A che ora aveu manda?
Tonina. A ora che tutti i galantomeni xe a disnar: a vint’ore1.
Gasparo. Se avessi manda a vintiuna, i n’averave trovà. Semo andai a visitar i canevi in magazen.
Tonina. Podè dir quel che volè, mi no ve credo nè bezzo, nè bagatin2.
Gasparo. Credè donca che sia un baron?
Tonina. Mi no so quel che siè, vedè.
Gasparo. Siora Tonina, no voria che ai sie de Febraro v’avesse da succeder qualch’altra cossa.
Tonina. Coss’è, sior? Me manazzaressi ancora?
Gasparo. Son galantomo, ve stimo, ve voggio ben, ma no me tirè per i cavei.
Tonina. Cossa voressi che ghe disesse a sior Raimondo e a siora Cattina?
Gasparo. Feghe le nostre scuse, e invideli a disnar quando che volè.
