 |
Questa pagina è stata trascritta, formattata e riletta. | |
| CHI LA FA L'ASPETTA | 437 |
SCENA IX.
Gasparo in tabarro, Tonina in zendale. Riosa col zendale sul braccio. Vengono senza dir gnente, un poco ingrugnati.
Riosa. Vorla despoggiarse? (a Tonina)
Tonina. Aspettè, me despoggerò co vorrò1.
Tonina. Me par de sentir un certo odor, come de roba da magnar... Sentìu vu? (a Riosa)
Riosa. Siora sì, me par anca a mi.
Gasparo. (ascolta e ride.)
Tonina. Ridè? Saveu qualcossa vu? (a Gasparo)
Gasparo. No saveu che gh’avemo l’osteria taccada muro con muro? Le se sente spesso ste galanterie.
Tonina. Sior Gasparo, mi non ho voleste dir gnente per strada per non far scene: avè voleste che vegna a casa, son vegnua, ho obbedio, perchè ai 6 de Febraro xe la zornada del voggio. Ma adesso mo in casa se poderave saver perchè, za che son vestia, no volè che andemo a far una visita a sior Raimondo e a sior Cattina?
Gasparo. Perchè ho da scriver, perchè gh’ho da far, e ancuo no ghe posso andar.
Tonina. Ben, se gh’ave da far, vu gh’anderè un’altra volta, e ancuo anderò mi colla donna.
Gasparo. Caveve zoa, e gh’anderè domattina.
Tonina. Mo perchè domattina? Mo perchè no ghe possio andar adesso, za che son vestia?
Gasparo. Cara fia, gh’ho le mie rason, perchè no gh’abbiè d’andar ancuo, e perchè gh’abbiè d’andar domattina.
Tonina. E a so muggier no se poderave dirghele ste rason?
Gasparo. (Oh poveretto mi!) Ve soddisferò, ve dirò la rason. Riosa, tolè sto tabarro, portelo de là.
- ↑ Spoglialevi.
- ↑ Forse seguivano alcune parole di Riosa.
