Pagina:Goldoni - Opere complete, Venezia 1915, XX.djvu/89

LE BARUFFE CHIOZZOTTE

81

Isidoro. Co i te domanda la pase, no i te voi mazzar.

Toffolo. I xe galiotti^a, lustrissimo.

Titta Nane. Olà, olà! (a Toffolo minacciandolo, acciò parli con rispetto)

Isidoro. Quietève. (a Titta) E ti parla ben, o te farò andar in t’un camerotto^b.

Toffolo. Quel che la comanda, lustrissimo.

Isidoro. Sastu che per le pierae che ti ha tratto, ti meriti anca ti d’esser processà, e che stante la malizia co la qual ti xe vegnù a querelar, ti sarà condanna in te le spese?

Toffolo. Mi so poveromo, lustrissimo; mi no posso spendere. Vegnì qua, mazzème; so poveromo, mazzème. (a Vicenzo e Titta)

Isidoro. (Costù el par semplice; ma el gh’ha un fondo de malizia de casa del diavolo).

Vicenzo. Daghe la pase, e la xe fenìa.

Toffolo. Voggio esser seguro della mia vita.

Isidoro. Ben, e mi te farò assicurar. Titta Nane, me deu parola a mi de no molestarlo?

Titta Nane. Mi sì, lustrissimo. Basta che el lassa stare Lucietta e che nol bazzega per quelle contrae.

Toffolo. Mi, fradelo, Lucietta no la gh’ho gnanca in mente, e no ziro^c colà^d per ela, no ziro.

Isidoro. Per chi ziristu donca?

Toffolo. Lustrissimo, anca mi so da maridare.

Isidoro. Mo via, di’ suso^e. Chi gh’astu da quelle bande?

Toffolo. Lustrissimo...

Vicenzo. Orsetta?

Toffolo. Made^f.

Isidoro. Checca fursi?

Toffolo. Ah, ah! bravo, lustrissimo, bravo. (ridendo)

Titta Nane. Ti xe un busiaro^g.

Toffolo. Per cossa busiaro?

1. Qui vuol dire bricconi.
2. Prigione all’oscuro.
3. Non giro, cioè non vado in que’ contorni.
4. Colà è ben detto in toscano: i Veneziani dicono là, ed i Chiozzotti, senza sapere il toscano, dicono colà.
5. Di’, parla.
6. No.
7. Tu sei un bugiardo.