Pagina:Goldoni - Opere complete, Venezia 1915, XX.djvu/40

32

ATTO PRIMO

Vicenzo. Me par de sì, che la ghe fusse anca ela.

Titta Nane. Sia maledìo! Giera là sotto prova a stivare el pesse: no ho gnanca podesto vegnire in terra.

Vicenzo. Oh che caro Titta Nane! Aveu paura de no vederla la vostra novizza?

Titta Nane. Se savessi! Muoro de voggia.

Fortunato. Parò Izenzo. (parla presto, e chiama paron Vicenzo)

Vicenzo. Coss’è, paron Fortunato?

Fortunato. Questo xe otto^a pesse. Quato^b cai foggi, do cai baboni, sie, sie, sie boseghe, e un cao baccole^c

Vicenzo. Cossa?

Fortunato. E un cao baccole.

Vicenzo. No v’intendo miga.

Fortunato. No intendè? Quattro cai de sfoggi, do cai de barboni, sie boseghe, e un cao de baracole.

Vicenzo. (El parla in t’una certa maniera...).

Fortunato. Mandè a casa e pesse, vegniò po mi a to¹ i bezzi.

Vicenzo. Missier sì, co volè i vostri bezzi, vegnì, che i sarà parecchiai.

Fortunato. Na pesa abacco.

Vicenzo. Come?

Fortunato. Tabacco, tabacco.

Vicenzo. Ho capìo. Volentiera. (gli dà tabacco)

Fortunato. Ho perso a scattoa in mare, e in tartana gh’è puochi e to tabacco. A Senegaggia e n’ho comprao un puoco; ma no xe e nostro da Chioza. Tabacco, tabacco de Senegaggia, e tabacco, e pare balini chioppo².

Vicenzo. Compatime, paron Fortunato, mi no v’intendo una maledetta.

Fortunato. Oh bella, bella, bella! no intendè? Bella! no parlo mia foeto³, parlo chiozzotto, parlo.

1. Il vostro.
2. Quattro.
3. Baracole. Pesce più picciolo della razza, ma della stessa specie

1. Verrò poi io a prendere ecc.
2. Sembrano pallini da schioppo.
3. Foresto.