Pagina:Goldoni - Opere complete, Venezia 1915, XX.djvu/220

210

ATTO TERZO

|

Madama. Perdonnez moi, mademoiselle, monsieur votre père ne me faira pas cette incivilité. (a ’Domenica)

Domenica. Me senterò mi donca. (siede)

Zamaria. (Cossa oggio da far? Bisogna che gh’abbia pazenzia). (sedendo Domenica presso Anzoletto)

Anzoletto. (Sia ringrazià el cielo!) (a Domenica)

Domenica. (Ghe son po arrivada). (ad Anzoletto)

Anzoletto. (No podeva più).

Marta. Siora Domenica?

Domenica. Siora.

Marta. (Oggio fatto pulito?) (alzandosi davanti a Momolo)

Domenica. (Pulitissimo). (alzandosi davanti a Momolo)

Momolo. Vorle che ghe diga, patrone? che sto vegnir davanti dei galantomeni in sta maniera, no la sta ben, e no la par bon. Voggio ben esser tutto quel che le vol; ma gnanca per el so zogattolo^a no le m’ha da tor. (con faccia soda)

Marta. Coss’è? Seu matto? (a Momolo)

Domenica. Che grillo^b ve xe salta? (a Momolo)

Zamaria. Momolo. Cossa xe sta? Cossa v’ali fatto?

Momolo. Caro sior Bastian, la me fazza la finezza de vegnir qua, perchè ste signore le me tol un pochetto troppo per man. (s’alza)

Bastian. Son qua, compare. No ve scaldè, perchè qua no ghe vedo rason de scaldarse. (s’alza dal suo posto, e va nell' altro)

Marta. No me par d’averve struppià. (a Momolo)

Momolo. Le se ferma, che me xe passà. (sedendo presso Polonia, e ridendo.)

Marta. Spieghèmela mo. (a Momolo)

Momolo. Adesso ghe la spiego in volgar. Tutti xe arente alla so colonna^c, e anca mi me son rampegà^d. Cossa diseu, vita mia? Oggio fatto ben? (a Polonia)

Polonia. Mo quando, quando fareu giudizio?

Momolo. El mese de mai quando vienlo?

1. Zogattolo, vuol dir giocolino; ma qui significa, che non vuol esser preso per mano, e disprezzato.
2. Che fantasia?
3. Vuol dir che tutti sono vicini alla persona che amano.
4. Rampicato, cioè acquistato.