Pagina:Goldoni - Opere complete, Venezia 1915, XX.djvu/161


UNA DELLE ULTIME SERE DI CARNOVALE 151

Domenica. Sior sì. sior sì; el xe onorato co fa una perlaa. Oh! vien zente.

Marta. Chi xeli?

Domenica. Sior’Alba co so mario. Con grazia, (s’alza, e va incontro)

Bastian. Xela quella che gh’ha sempre mal? (a Marta)

Marta. Sì, chi la sente ela, la xe sempre ammalada; ma no la starave a casa una sera, chi la copasse. (a Bastian)

SCENA X.
Alba, Lazaro e detti.

Domenica. Patrona, sior’Alba.

Alba. Patrona. (si baciano) Patrona. (a Marta)

Marta. Patrona. (si baciano)

Bastian. Compare Lazaro.

Lazaro. Patron, sior Bashan. (si baciano Bastian e Lazaro fra di loro)

Domenica. Cossa fala? Stala ben? (ad Alba)

Alba. Gh’ho un dolorazzo de testa, che no ghe vedo.

Domenica. La se senta. La me daga qua el tabarin.

Alba. No, no, la lassa; che gh’ho piuttosto freddo. Gh’ho un tremazzo intornob...

Domenica. Vorla un poco de fogo?

Alba. La me farà grazia.

Domenica. Adesso gh’anderò a tior el scaldapiè. E ela ghe ne vorla?

Marta. Oh! mi no, la veda, stago benissimo.

Domenica. Le compatissa, vago mi, perchè la donnac no pol. (La podeva far de manco de vegnir sta giazzèra). (parte)

Lazaro. Co gh’avevi mal, dovevi star a casa, cara fia.

Alba. Eh! me passerà.

Bastian. (Bisogna che ghe sia vegnù mal per strada. Se la s’avesse sentìo qualcossa a casa, no la sarave vegnua).

  1. Onorato come l’oro.
  2. Trema da freddo, ha de’ brividi.
  3. La serva di casa.