 |
Questa pagina è stata trascritta, formattata e riletta. | |
| UNA DELLE ULTIME SERE DI CARNOVALE | 145 |
Marta. Maridada la xe!
Elenetta. Servirla.
Marta. Vardè, vede! Mi no credeva.
Bastian. Permettela? (siede presso di Elena)
Elenetta. (Oh caro! Perchè no se sèntela arente de so muggier?) (guardando verso la scena, e scostandosi)
Bastian. Coss’è? No la vol che me senta arente de ela? (accostandosi)
Elenetta. La se comoda pur. Con grazia, (s’alza, e va a sedere dall’altra parte.)
Marta. (Mo la godo ben dasseno).
Bastian. Coss’è, signora? Cossa gh’ala paura? Cossa crédela che mi sia? (a Elena)
Elenetta. Caro elo, el compatissa. So che fazzo una mala creanza; ma se vien mio mario, poveretta mi.
Bastian. Xelo qualche vecchio sto so mario?
Elenetta. Oh! sior no; el xe zovene più de mi.
Bastian. E el patisse1 sto boccon de malinconia?
Marta. Chi xelo so consorte?
Elenetta. Sior Agustin Menueli.
Marta. (Oh! lo cognosso. No me dago gnente de maraveggia).
Bastian. (L’ho dito, che nol podeva esser altro che un pampalugo).
Marta. Cossa vuol dir, che nol xe qua anca elo, sior Agustin?
Elenetta. Siora sì, che ’l ghe xe. El xe andà de suso co sior santolo Zamaria. De diana! la vorave che fosse vegnua senza mio mario?
Marta. Saravelo un gran delitto? In casa de persone oneste e civil, no se pol andar qualche volta senza so mario?
Elenetta. Oh! mi no vago fora della porta senza de elo.
Bastian. E sior Agustin lo lassela andar? Lo lassela praticar?
Elenetta. De dia! ghe sgrafferave i occhi.
Bastian. Oh! se fusse mi so mario...
Elenetta. Cossa faravelo?
- ↑ Così corregge il Cameroni nella serie seconda dei Capolavori di C. G., Trieste, 1858. L’ed. Pasquali stampa, con errore evidente: E, patisse ecc.; e l’ed. Zatta: E patisse ecc.
