 |
Questa pagina è stata trascritta, formattata e riletta. | |
| LE BARUFFE CHIOZZOTTE | 97 |
Checca. Tiò la man. (a Toffolo.)
Toffolo. Muggiere.
Checca. Marìo.
Toffolo. E viva.
Fortunato. E viva allegramente. Muggiere, anca mi so in gringolaa.
Servitore. Xe qua tutti, co la comanda. (a Isidoro)
Isidoro. Novizzi, allegramente. V’ho parecchià un poco de rinfresco; gh’ho un per de sonadori; vegnì con mi, che vôi che se devertimo. Andemo, che balleremo quattro furlaneb.
Orsetta. Qua, qua ballemo, qua.
Isidoro. Sì ben, dove che volè. Animo, portè fuora delle careghe. Fè vegnir avanti quei sonadori; e ti, Sansuga, va al casin, e porta qua quel rinfresco.
Lucietta. Sior sì, ballemo, devertimose, za che semo novizzi: ma la senta, lustrissimo, ghe vorave dire do parolette. Mi ghe son obligà de quel che l’ha fatto per mi, e anca ste altre novizze le ghe xe obligae; ma me despiase che el xe forestoc, e col va via de sto liogo, no vorave che el pariasse de nu, e che andasse fuora la nomina che le Chiozzotte xe baruffante; perchè quel che l’ha visto e sentìo, xe sta un accidente. Semo donne da ben, e semo donne onorate; ma semo allegre, e volemo stare aliegre, e volemo ballare, e volemo saltare. E volemo che tutti possa dire: e viva le Chiozzotte, e viva le Chiozzotte.
Fine della Commedia.
