 |
Questa pagina è stata trascritta, formattata e riletta. | |
| 68 | ATTO SECONDO |
Lucietta. Xela sola?
Margarita. Sola. Chi voressi che ghe fusse, patrona? (a Lucietta)
Lucietta. Via siora madre, che la sia bona, che ghe vôi tanto ben. (allegra)
Marina. Sentiremo qualcossa.
Lucietta. Sentiremo qualcossa. (allegra)
SCENA VIII.
Felice in maschera in bautta1, e dette.
Felice. Patrone. (tutte rispondono patrona, secondo il solito)
Margarita. Molto tardi, siora Felice; v’avè fatto desiderar.
Lucietta. De dianaa! se lavemo desiderada.
Felice. Se savessi! Ve conterò.
Marina. Sola sè? No gh’è gnanca vostro mario?
Felice. Oh, el ghe xe quel torso de verzab.
Margarita. Dove xelo?
Felice. L’ho manda in mezzà da vostro mario. No ho volesto che el vegna de qua, perchè v’ho da parlar.
Lucietta. (Oh, se la gh’avesse qualche bona niova da darme!)
Felice. Saveu chi ghe xe in mezzà con lori?
Marina. Mio mario?
Felice. E sì ben, ma ghe xe un altro.
Marina. Chi?
Felice. Sior Maurizio.
Lucietta. (El padre del putto!) (con allegria)
Marina. Come l’aveu savesto?
Felice. Mio mario, che anca elo xe un tangaro, avanti de andar in mezzà, l’ha volesto saver chi ghe giera, e la serva gh’ha ditto che ghe giera sior Simon e sior Maurizio.
Marina. Cossa mai fali?
Felice. Mi credo, vede, mi credo che i stabilissa quel certo negozio...
- ↑ Ed. Pasquali: bavuta.
