Pagina:Goldoni - Opere complete, Venezia 1914, XVIII.djvu/59

I RUSTEGHI

51

Lucietta. Magari.

Margarita. Adesso ve la vago a tor. (Poverazza! la compatisso. Nualtre donne, figurarse, semo tutte cussì). (parte)

SCENA ii.

Lucietta e detta.

Lucietta. Vardè! la dise che mio sior padre no vol. Credo che la sia ela mi, che no voggia. Xe vero che sior padre xe un omo rustego, e che in casa nol vol certe¹ belle cosse, ma ela però la s’ha savesto vestir, e co la vol un abito, la se lo fa, e la lassa che el diga. Ma per mi, poverazza, no se ghe pensa. Maregna^a, basta cussì. E po la cognosso, la gh’ha rabbia con mi, perchè son più zovene e più bella de ela. In casa ghe fazzo fastidio. La me dise fia co la bocca stretta; co ghe digo siora madre, la gh’ha paura che ghe fazza crescer i anni.

Margarita. Via, caveve quella traversa.

Lucietta. Siora sì, subito. (si cava il grembiale)

Margarita. Vegnì qua, che ve metterò le cascate.

Lucietta. Cara ela, la lassa véder.

Margarita. Vardè; le xe squasi nove.

Lucietta. Cossa vorla che fazza de sti scovoli^b da lavar i piatti?

Margarita. Scovoli ghe disè? Un per de cascate de cambrada², che no le ho doperae quattro volte.

Lucietta. No la vede co fiappe^c che le xe?

Margarita. Vardè che desgrazia! certo che i ve vegnirà a vardar le cascate, se le xe de lissìa³.

1. Matrigna.
2. Scovolo in veneziano e uno spazzolino di sarmenti di biade minute, con cui si ripuliscono i tondi in cucina.
3. Appassite.

1. Ed. Zatta: certo.
2. Cambriaia, tela finissima di Cambrar. Oltre Patriarchi, Boerio e Mutinelli, v. il Dizionario di commercio dei signori fratelli Savary, ed. italiana di Venezia, Pasquali. 1770.
3. Di bucato¹ .
   1. Da lisciva. Anticamente lissìa. come ben avverte il Boerio e come spesso si legge ne’ poeti veneziani; oggi comunemente lìssia.