 |
Questa pagina è stata trascritta, formattata e riletta. | |
| LA BUONA MADRE | 467 |
Nicoletto. Se l’avesse sentio cossa che m’ha ditto mia madre.
Agnese. (Vardè cossa che fa una correzion a tempo). Donca no ve volè più maridar?
Nicoletto. Siora no, ghe digo.
Agnese. Mo per cossa?
Nicoletto. Perchè m’arecordo che m’ha ditto siora madre, che son un povero putto, che no gh’ho gnente a sto mondo, che no me posso mantegnir mi, la varda po se poderò mantegnir la muggier.
Agnese. E se trovessi una muggier che ve mantegnisse vu?
Nicoletto. Ghe ne xe delle muggier cha mantien i marii?
Agnese. Ghe ne xe; ma ghe ne xe de più sorte. Disè, no la v’ha ditto gnente vostra siora madre?
Nicoletto. De cossa?
Agnese. Che la ve vol maridar.
Nicoletto. Eh cara ela, no la me fazza andar in collera, che son tavanàa che basta.
Agnese. De mi no la v’ha ditto gnente?
Nicoletto. De ela? gnente.
Agnese. (Che ghe l’abbia da dir mi, no la va miga ben).
Nicoletto. Mi ghe ne dirò ben una granda.
Agnese. Via mo.
Nicoletto. Che non avemo gnancora disnà.
Agnese. Voleu vegnir a disnar con mi?
Nicoletto. Se siora madre se contentasse.
Agnese. Ghe vegniressi volentiera con mi?
Nicoletto. Mi sì, la veda.
Agnese. Ghe staressi con mi?
Nicoletto. Se siora madre volesse...
Agnese. Ma no ve volè maridar, nevvero?
Nicoletto. De diana! gnanca per insonio.
Agnese. (Stemo freschi).
Nicoletto. Mo perchè me disela sempre de maridarme?
Agnese. Perchè, se volessi, ghe saria l’occasion.
- ↑ Afflitto.
