 |
Questa pagina è stata trascritta, formattata e riletta. | |
| LA BUONA MADRE | 443 |
Lodovica. Oh, mi no vôi gnente, vedè. Nè mi, nè la mia putta, no semo de quelle. Ma co se pratica, co se vol ben, e co se ghe n’ha, e co se gh’ha cuor, se procura de farlo cognosser con civiltà, con bona maniera, e no se vien a far delle spampanaea: gh’ho questo, e gh’ho st’altro. Se li gh’avè, pettevèli.
Nicoletto. Da una banda la gh’ha rason. Se non ho fatto, farò. (mortificato)
Lodovica. Ve n’aveu per mal, fio? Ve parlo da mareb, savè. Perchè, vedeu? vorave che Daniela fusse segura, che ghe volè ben.
Nicoletto. Se no ghe volesse ben, no vegnirave qua.
Lodovica. Oh sì, sì; ma se va cussì, delle volte, per devertirse.
Daniela. Se no fusse segura che el me volesse ben, me vorave andar a negar c.
Nicoletto. De diana! ghe ne voggio tanto.
Lodovica. Ma che intenzion gh’aveu? Spiegheve.
Nicoletto. Cossa vorla che diga? No sala?
Daniela. Oe, sta a vu, vedè. Per mi no digo de no seguro.
Lodovica. Oh, no sta nè a vu, nè a elo, patrona. Bisogna véder se mi voggio.
Nicoletto. Mo cossa no vorla?
Lodovica. Mi no voggio morosetti per casa. Ho fatto la guardia alle mie putte tanto che basta. Ghe n’ho maridà tre, fio caro, e con tutti ho ditto cussì. O drento, o forad.
Daniela. O che el dise dasseno, o che el dise da burla. Se el dise dasseno, tanto fa che se destrighemo.
Nicoletto. (Cossa che me trema le gambe!)
Lodovica. Da chi dependeu?
Nicoletto. Da nissun.
Daniela. Ghe comandela so siora madre?
Nicoletto. Oh giusto! no son miga un puttelo.
Daniela. Perchè vorlo tirar avanti?
