 |
Questa pagina è stata trascritta, formattata e riletta. | |
| 442 | ATTO TERZO |
Nicoletto. Oe, un pochette la dise? (a Lodovica)
Lodovica. No vedistu, fia, se el te vol ben? El xe andà a Rialto, el xe andà a far i so servizietti, da ometto, e po subito el xe tornà. Disè, sior Nicoletto, i aveu scossi i bezzi a Rialto?
Nicoletto. Siora no, no i ho scossi?
Lodovica. Mo perchè no i aveu scossi?
Nicoletto. Perchè quel che li aveva da dar, nol giera gnancora vegnù, e mi m’ho stufà de aspettar, e son vegnù via.
Lodovica. Vedeu? avè fatto mal, dovevi aspettarlo.
Nicoletto. M’ha premesto de vegnir qua. No vedeva l’ora de tornar a véder siora Daniela.
Lodovica. No seu stà qua tutta stamattina? Che bisogno ghe giera, che lassessi star de far i vostri interessi? Queste le xe puttelae a.
Daniela. Poverazzo! Se vede che el me vol ben.
Lodovica. Oh el ben, el ben... ghe vol altro che ben. Se l’avesse scosso i so bezzi, se el fusse vegnù qua coi sie o settecento ducati in scarsella, l’averave parso più bon.
Nicoletto. Crédela che no gh’abbia bezzi? Se la vedesse quanti che ghe n’ho a casa!
Lodovica. E adosso no ghe ne portè?
Nicoletto. No ghe ne porto, perchè son troppo ladinb; gh’ho le man sbusec. Co ghe n’ho, no i xe mii. Se i me ne domanda, no me posso tegnir. Averò d’aver o tre o quattro mille ducati de bezzi imprestai.
Lodovica. Mi ho pensier, sior Nicoletto, che siè una bella panchianad.
Daniela. Via, no la ghe diga ste cosse.
Nicoletto. Mi panchiana? Per cossa?
Lodovica. Perchè sta vostra generosità in casa nostra no l’avemo gnancora vista.
Nicoletto. Cossa vorla che fazza? La diga.
