 |
Questa pagina è stata trascritta, formattata e riletta. | |
| 30 | ATTO PRIMO |
Margarita. Senza dir gnente?
Lunardo. Son paron mi.
Margarita. Cossa ghe deu de dota?
Lunardo. Quello che voggio mi.
Margarita. Mi son una statua, donca1. A mi, figurarse, no se me dise gnente.
Lunardo. Figurarse, figurarse, no ve lo dighio adesso?
Margarita. Sior sì, e la putta quando lo saverala?
Lunardo. Co la se sposerà.
Margarita. E no i s’ha da véder avanti?
Lunardo. Siora no.
Margarita. Seu seguro che el gh’abbia da piaser?
Lunardo. Son paron mi.
Margarita. Ben ben, la xe vostra fia. Mi no me n’impazzoa; fe pur quel che volè vu.
Lunardo. Mia fia no vôi che nissun possa dir d’averla vista, e quel che la vede, l’ha da sposar.
Margarita. E se col la vede, nol la volesse?
Lunardo. So pare m’ha dà parola.
Margarita. Oh che bel matrimonio
Lunardo. Cossa voressi? che i fasse prima l’amor?
Margarita. I batte, i batte; vago a veder chi è.
Lunardo. No ghe xe la serva?
Margarita. La xe a far i letti, anderò a veder mi.
Lunardo. Siora no. No vôi che andè sul balcon.
Margarita. Vardè che casi!
Lunardo. No vôi che gh’andè, gh’anderò mi. Comando mi, vegnimo a dir el merito, comando mi. (parte)
- ↑ Non m’impiccio.
- ↑ L’ed. Zatta ha il punto interrogativo.
