 |
Questa pagina è stata trascritta, formattata e riletta. | |
| LA CASA NOVA | 325 |
Checca. Oh putto caro, ti ghe xe ben drento fina in ti occhi. Ande là, andè là, ma abbiè giudizio, no ve fe smattara.
Lorenzino. Benedetta siora zermana. (parte saltando)
SCENA VI.
Checca e Rosina.
Rosina. Disè, siora Checca. Me lasseu andar anca mi un pochettin?
Checca. A cossa far?
Rosina. A spionar.
Checca. Certo! una bella cossa! pareressi bon veramente!
Rosina. Via, se no volè che vaga, lasserò star. Ch’aveva voggia de sentir, se siora Meneghina parla pulito.
Checca. No la sentireu, co la vegnirà da nu?
Rosina. Oh vattela a cerca co la vegniràb.
Checca. Vardè mo, ghe xe zente in portego?
Rosina. Me par anca mi de sentir. (sì accosta alla porta) Oe, saveu chi credo che sia? Per diana de dia, che credo che sia siora Meneghina.
Checca. Eh via!
Rosina. Ho visto zente sulla scala, che parla col servitor; no ho volesto farme veder, per no parer...
Checca. Avè fatto ben.
Rosina. Velo qua Toni. Sentiremo.
Servitore. Lustrissima, sta signora che xe vegnua a star da novo qua de sotto, la vorave reverir.
Checca. Xela la putta, o la maridada?
Servitore. Mi no so, lustrissima, mi no le cognosso.
Rosina. Gh’ala i cerchic?
Servitore. Lustrissima no.
Rosina. La sarà la putta.
Checca. Diseghe che la resta servida.
