 |
Questa pagina è stata trascritta, formattata e riletta. | |
| LA CASA NOVA | 317 |
Checca. Come faralo sior Anzoletto a mantegnirla in quell’aria?
Rosina. Co la dota che la gh’ha portà, no certo.
Checca. Aveu sentio Lorenzin? No la gh’ha dà squasi gnente. E quel pandòloa de so mario el spende a rotta de collo.
Rosina. Vardè cossa che i averà speso in sta casa! Xe do mesi che i ghe xe drio.
Checca. E sì, savè, in te la prima peatab che xe vegnua a la riva, no ghe giara altro che delle strazzec.
Rosina. Peata ghe disè? No parevelo un battellod da fassi1?
Checca. Sì, sì, xe vero, el giera un battelotto. Aveu visto quel specchio co la soaza negrae?
Rosina. Antigaggie.
Checca. E quei caregoni2 de bulgarof?
Rosina. I mobili de so bisnonno.
Checca. I butterà via un mondo de bezzi in pittori, in favri, in marangoni, e po no i gh’averà una camera de bon gusto.
Rosina. Possibile che no l’abbiemo da véder?
Checca. De dia! la vôi véder se credesse d’andarghe una festa, co no le ghe xe.
Rosina. E Lorenzin, poverazzo, che s’ha raccomandà che parlemo alla putta?
Checca. Povero putto, l’ha perso el bagoletto3 de véderla tutto el dì sul balcon.
Rosina. Che parlereu a siora Meneghina?
Checca. Per contentarlo ghe parlerò. Ma nol xe negozio per elo.
Rosina. Per cossa?
Checca. Perchè i dise che so fradello no ghe pol dar gnente de dota.
Rosina. E sì el ghe vol ben assae Lorenzin.
Checca. Lassè pur che el ghe voggia ben. Anca lu xe un povero gioppog. L’amor no fa boggier la pignattah, sorella cara.
