Pagina:Goldoni - Opere complete, Venezia 1914, XVIII.djvu/330

316

ATTO SECONDO

Rosina. Rusteghe no me par che le sia, perchè se vede che le pratica.

Checca. Se le pratica? e come! Vardè, la novizza xe quindese zorni che la xe maridada, e oramai la gh’ha el cavalier che la serve.

Rosina. E la putta? no ala fatto l’amor tutto el tempo de vita soa?

Checca. Per quel che dise nostro zerman^a Lorenzin, fora de casa la va col zendà fina alla centura^b, ma in casa, e sui balconi, no la se schiva da nissun^c.

Rosina. No n’alo contà, che i fava l’amor insieme tutto el zorno e tutta la notte?

Checca. Vardè che putte! Sentì, savè, sorella, no tolè esempio da ste frascone^d. Mi posso dir che mio mario xe sta el primo zovene che m’ha parlà. Savè che n’ha arlevà nostra madre, e adesso che sè con mi...

Rosina. Cara sorella, no gh’è bisogno che me fe sti sermoni. Savè che putta che son.

Checca. Per cossa credemio che ste patrone da basso no le n’abbia volesto recever?

Rosina. Ve dirò, pol esser, come che ancuo solamente le xe vegnue in casa nova, che la casa no sia destrigada, che no la sia gnancora fornia, e che per questo no le voggia nissun per i pìe.

Checca. Saveu che no disè mal? Bisogna che le sia superbe la so bona parte. Veramente, confesso la verità, avemo avù troppa pressa^e d’andar; se podeva aspettar doman, ma gh’ho tanta curiosità de veder sta novizza darente^f, che no m’ho podesto tegnir.

Rosina. Mi l’ho vista, co la xe vegnua. No me par che ghe sia sti miracoli^g.

Checca. I dise che la gh’ha un gran spirito.

Rosina. Ho visto certo dell’aria tanta.

1. Cugino.
2. Coperta dal manto, o sia taffettà nero, sino alla cintola, che vuol dire modestamente.
3. Non ha difficolta di lasciarsi vedere.
4. Giovani scostumate, senza giudizio.
5. Premura.
6. Da vicino.
7. Che vi siano maraviglie di bellezza.