Pagina:Goldoni - Opere complete, Venezia 1914, XVIII.djvu/32

24

ATTO PRIMO

Margarita. Oh figurarse se no lo dirè!

Lucietta. No dasseno, figurarse, che no lo digo.

Margarita. Cossa gh’intra sto figurarse?

Lucietta. No so gnanca mi, gh’ho sto uso, el digo che no me n’incorzo. (ironicamente)

Margarita. (Gh’ho in testa, che la me burla mi sta frascona).

Lucietta. La diga, siora madre.

Margarita. Animo laorè^a, l’aveu gnancora fenia quella calza?

Lucietta. Debotto.

Margarita. Se el vien a casa elo^b, e che la calza no sia fenia, el dirà che sè stada su per i balconi, e mi no vôi, figurarse... (sia maledetto sto vizio!)

Lucietta. La varda co spessego^c. La me diga qualcossa de sto novizzo^d.

Margarita. De qual novizzo?

Lucietta. No disela che me mariderò?

Margarita. Pol esser.

Lucietta. Cara ela, se la sa qualcossa.

Margarita. No so gnente. (con un poco di collera)

Lucietta. Gnanca mo gnente, mo, gnanca mo^e.

Margarita. Son stuffa.

Lucietta. Sia malignazo^f. (con rabbia)

Margarita. Coss’è sti sesti^g?

Lucietta. No gh’ho nissun a sto mondo, che me voggia ben.

Margarita. Ve ne voggio anca troppo, frascona.

Lucietta. Ben da maregna^h. (a mezza voce)

Margarita. Cossa aveu ditto?

Lucietta. Gnente.

Margarita. Sentì, savè, no me stè a seccar, che debotto, debotto...

(con isdegno) Davantazoⁱ. ghe ne sopporto assae in sta casa.

1. Via lavorate
2. Egli, cioè s’intende il padrone di casa
3. Come io mi sollecito
4. Sposo
5. Quel mo replicato è un certo modo caricato di lamentarsi conveniente all’età di Lucietta.
6. Lo stesso che maladetto, ma con più modestia.
7. Che malegrazie son queste!
8. Matrigna.
9. Di vantaggio.