 |
Questa pagina è stata trascritta, formattata e riletta. | |
| LA CASA NOVA | 289 |
Lucietta. Eh, quel che gh’aveva là, xe difficile che qua lo gh’abbia.
Sgualdo. Disè la verità, Lucietta, ve despiase per le serve, o per qualche bel servitor.
Lucietta. Un poco per uno, un poco per l’altro.
Sgualdo. I omeni i ve pol vegnir a trovar.
Lucietta. Sì, sì, ma mi no son de quelle che fa vegnir i omeni in casa. Qualche volta, se pol dar, cussì de sbrissona, co vago a trar el vin, ma do parole, e via, no voggio che i possa dir, se me capì.
Sgualdo. Eh siora sì, ve capisso.
Lucietta. Credème, sior Sgualdo, che no me despiase tanto per mi d’esser vegnua via de quella casa, quanto per la mia povera paronzina.
Sgualdo. Perchè? No la xe contenta siora Meneghina? No la ghe piase gnanca a ella sta casa?
Lucietta. Ve dirò, ma vardè ben, vede, no disè gnente a nissun, e po so che omo che sè. De là, vedeu, la gh’aveva el moroso in fazza, e la lo vedeva da tutte le ore, e la notte la vegniva dessuso in te la mia camera, e stevimo le ore con le ore a parlar, ella col patron, e mi col servitor, e se devertivimo, e se consolevimo un pochettin. Tolè suso, semo qua tutte do muffe, muffe b, senza un can che ne varda.
Sgualdo. Perchè no la maridelo so fradello?
Lucietta. Eh, debotto me la faressi dir. Con cossa voleu che el la marida?
Sgualdo. Ala sempre da star cussì?
Lucietta. Poverazza! se un so barbac no l’agiuta, la vedo mal intrigadad.
Sgualdo. Sì ben; so sior barba Cristofolo el xe ricco, e se el vol, el la pol agiutar.
Lucietta. El xe instizzàe co sto so nevodo, che ha voleste sempre far de so testa, e el s’ha maridà senza dirghelo, e la povera putta torrà de mezzo.
