Pagina:Goldoni - Opere complete, Venezia 1914, XIX.djvu/487

SIOR TODERO BRONTOLON

471

Nicoletto. Mi sì che la sposeria.

Cecilia. Bisognerave veder, se mi lo volesse.

Marcolina. La varda, cara ela! che casi! Stamattina cossa m’ala ditto?

Cecilia. Mo no védela che no gh’importa gnente de mi? Che el me lassa mi per un’altra?

Marcolina. Per un’altra? Coss’è sto dir per un’altra? Ve metteressi dal pari con una mia fia?

Fortunata. Creature^a, queste xe tutte chiaccole che no serve gnente. Se vede che sti do se vol ben; ma el putto i l’ha fatto zo^b, e Cecilia se n’ha avù un pochette per mal. Siora Marcolina, se la se contenta, mi voggio che la giustemo. Co l’è fatta, l’è fatta. Sto povero putto me fa peccà. Cecilia gh’ha del merito, e bisogna procurar de farghe sto ben. Maridemoli^c, e co i sarà maridai, la sarà fenia. Cossa diseu, sior Nicoletto?

Nicoletto. Certo! acciò che i me daga delle bastonae?

Marcolina. Mo no, caro fio, no ghe sarà sto pericolo. Diseva cussì, se pretendevi Zanetta, no miga per no darvela a vu, che sè un putto de garbo; ma perchè l’ho promessa a un altro, e perchè son desgustada co mio missier. Da resto ve voggio ben, ve assisterò, ve defenderò, no ve lasserò mancar el vostro bisogno. Se sior Todero ve manderà via, ve farò trovar un impiego.

Fortunata. Sì, sior Meneghetto ghe lo troverà.

Marcolina. Via, Nicoletto, cossa respondeu?

Nicoletto. Cossa vorla che diga? Mi farò tutto quel che la vol.

Marcolina. E vu, Cecilia, cossa diseu?

Cecilia. Cara ela, co la s’impegna che no ne mancherà pan¹...

Marcolina. Credo che me cognossè, credo che de mi ve possiè fidar.

1. Termine d’amicizia.
2. L’hanno tirato giù.
3. Maritiamoli insieme.

1. Così l’edizione di Trieste citata, per cura di F. Cameroni. Mancano questi puntini nelle edizioni del Settecento.