Pagina:Goldoni - Opere complete, Venezia 1914, XIX.djvu/484

468

ATTO SECONDO

SCENA IV.

Altra camera.

Cecilia e Nicoletto.

Cecilia. Vegnì mo qua, sior, cossa diavolo me diseu?

Nicoletto. Zitto, che no i senta.

Cecilia. Eh! no ghe xe nissun. Disè, disè; cossa v’insunieu¹?

Nicoletto. Mi no m’insonio gnente. Ve digo cussì, che sior Todero me vol dar so nezza.

Cecilia. A chi?

Nicoletto. A mi.

Cecilia. Con quel muso^a?

Nicoletto. Co sto muso.

Cecilia. Eh! via, andeghela a contar ai morti.

Nicoletto. Sangue de diana, che me faressi dir! Cossa songio? Un pampalugo^b? Non ho da saver quel che i dise? Doman m’ho da maridar, e non ho da saver chi ha da esser mia muggier?

Cecilia. Doman v’avè da maridar?

Nicoletto. Siora sì, doman.

Cecilia. Chi ve l’ha ditto?

Nicoletto. Sior pare me l’ha ditto. E el m’ha ditto, che gnancora no diga gnente a nissun.

Cecilia. (Per diana! scomenzo a aver paura che el diga la verità. Se fusse mi, i m’averave ditto qualcossa).

Nicoletto. E no dormirò più co sior pare, e mi gh’averò la camera tutta per mi, e lu l’anderà a dormir in mezzà, e mi gh’averò la novizza, e i me vestirà pulito, e anderò fora de casa quando che vorrò mi. (gloriandosi di tutto questo)

Cecilia. (La xe una cossa che me farave strassecolar^c). Come diavolo se pol dar, che el paron ve voggia dar a vu una so nezza?

Nicoletto. Varè, vedè². Cossa songio mi^d?

1. Segno di disprezzo, volendo dire, che non ha faccia che meriti una tale sposa.
2. Uno sciocco.
3. Uscir de’ secoli, dar la volta al cervello.
4. Cosa sono, o chi sono?

1. Cosa vi sognate? Vol. VIII, 143 ecc.
2. Guardate, veh: vol. VIII. 156 ecc.