Pagina:Goldoni - Opere complete, Venezia 1914, XIX.djvu/466

450 ATTO SECONDO

SCENA XII.

Marcolina e Fortunata.

Marcolina. Mi veramente l’aveva mandada a incomodar per una razon; ma adesso ghe n’ho diese che me obliga a pregarla, a sconzurarla de assisterme, de no me abbandonar.

Fortunata. Cara siora Marcolina, son qua in quel che posso, con tutto el cuor. Veramente giera andada un pochetto in collera; ma ho pensà che ela no ghe n’ha colpa, e quel putto m’ha tanto savesto dir, che no so per lori cossa che no farave.

Marcolina. Aveva giusto a caro de saver da ela, co l’è andà via de qua, cossa che l’ha ditto: se l’ha preteso de cavarse con civiltà, o se el gh’ha veramente per la mia putta quella premura che el mostrava d’aver.

Fortunata. Che attesto e ghe protesto, che un putto più schietto e più sincier nol gh’è, nol ghe xe sta, e nol ghe sarà. No ala sentio? El xe pronto a soffrir, a aspettar...

Marcolina. El punto sta, siora Fortunata, che più che stemo, faremo pezo. Ghe xe delle cosse per aria con quel mio missier... Se ghe disesse tutto, la se metteria le man in ti cavei.

Fortunata. La diga: senza che buttemo via le parole tra ela e mi, che mi za la sa che no posso concluder gnente, parleravela volentiera un’altra volta col putto?

Marcolina. Magari che el cielo volesse.

Fortunata. Se la vol, el xe poco lontan. Co xe vegnù la so serva, el giera a casa da mi. Curioso anca elo, gramo, perchè la sa... la zoventù... la ghe piase... no l’ha mai fatto l’amor... el m’ha compagnà fin da basso, e el m’aspetta da quel dalle acque1. Ch’ala balconi che varda in calle?

Marcolina. Siora sì; quel balcon che xe là, varda giusto sora quel dalle acque.

Fortunata. Vorla che el chiama?

  1. Acquacedrataio, caffettiere: Patriarchi e Boerio.