 |
Questa pagina è stata trascritta, formattata e riletta. | |
| SIOR TODERO BRONTOLON | 445 |
Marcolina. Ma diseme, cara vu, con che fondamento vorlo mio missier maridar sto putto?
Cecilia. Mi no so po, i ghe penserà lori; so che lo sa anca sior Desiderio.
Marcolina. E quella volpe vecchia de sior Desiderio, che in materia del so interesse xe fursi pezo de mio missier, che pretende de esser nostro parente, che disna a tola con mi, se contenterà che so fio sposa una cameriera, che no gh’ha dota, che no gh’ha gnente a sto mondo?
Cecilia. Cara ela, se no gh’ho dota, gh’ho dell’abilità, e anca mi gh’ho dei parenti che xe civili al pari de sior Desiderio, e anca qualcossetta de più.
Marcolina. Ma lo saveu de certo che i voggia maridar Nicoletto, e che vu siè quella che i ghe vol dar? Cossa v’alo ditto? Come v’alo parlà?
Cecilia. Ghe dirò, co xe andà da basso el paron, el m’ha chiama Nicoletto, e el dise... No savè, el dise, sior Todero me vol maridar. Digo mi: dasseno? Sì, dasseno, el dise. Digo mi, digo: chi ve vorlo dar? El dise: no so, el dise. El m’ha ditto che la cognosso, che col saverò, gh’averò da caro. Oh, digo, vu no conossè nissun, bisogna che la novizza sia in casa. El dise... bisogna, el dise. Digo mi, digo: se fusse mi quella? Magari, el dise. Oe, el gh’ha un gusto matto, e anca mi in verità son contenta.
Marcolina. E no gh’avè altro fondamento che questo?
Cecilia. Oh! la senta, la senta. Sala quante volte che el paron m’ha ditto che el me vol maridar?
Marcolina. V’alo mai parla de Nicoletto?
Cecilia. Oh giusto! no sala che omo che el xe? El xe capace de chiamarme dal ditto al fatto, e dirme: sposilo, che vôi che ti lo sposi. Oe, se el me lo dirà, e mi lo sposerò.
Marcolina. Ben, ben, ho inteso.
Cecilia. Ghe despiase che me marida?
Marcolina. Ande, andè, dove che v’ho ditto.
Cecilia. De diana! mi son vegnua a parlarghe col cuor averto...
