 |
Questa pagina è stata trascritta, formattata e riletta. | |
| 444 | ATTO SECONDO |
Marcolina. Su che particolar?
Cecilia. Su un particolar mio de mi.
Marcolina. (Vardava se la saveva qualcossa sul proposito de mia fia). Via, destrigheve, che me preme che andè a far sto servizio.
Cecilia. Ma la prego de no dir gnente a nissun.
Marcolina. Che bisogno ghe xe? Co no s’ha da parlar, mi no parlerò.
Cecilia. La senta: el paron vecchio el vol maridar Nicoletto.
Marcolina. El vol maridar Nicoletto? Come l’aveu savesto?
Cecilia. Ghe dirò tutto; ma cara ela, no la diga gnente a nissun.
Marcolina. Mo via, cossa serve? Diseme, come l’aveu savesto?
Cecilia. No vorave che qualchedun me sentisse. (va a guardare)
Marcolina. (Poveretta mi! che a quel vecchio ghe fusse vegnù in testa la bestialità de darghe mia fia?)
Cecilia. La senta. Nicoletto me l’ha confidà elo.
Marcolina. Elo ve l’ha confidà? Cossa v’alo ditto?
Cecilia. Eh! m’ha ditto cussì che sior Todero lo vol maridar.
Marcolina. E chi gh’alo intenzion de volerghe dar?
Cecilia. Se no l’andasse in collera, mi ghe lo diria.
Marcolina. In collera? Ho d’andar in collera? Gh’entrio mi in sto negozio, che ho d’andar in collera?
Cecilia. Se volemo, la ghe pol intrar, e no la ghe pol intrar.
Marcolina. (Me vien un freddo dalle ongie dei pì fin alle raìse dei cavei).
Cecilia. La senta. Pol esser ancora che falla; ma da quel che m’ha ditto Nicoletto, e da quel che mi posso congetturar, credo certo de no m’ingannar.
Marcolina. E cussì, se pol saver chi la sia?
Cecilia. Se gh’ho da dir la verità, gh’ho pensier d’esser mi.
Marcolina. Vu?
Cecilia. Siora sì, mi.
Marcolina. (Oimei, me xe torna el fià in corpo).
Cecilia. Ghe lo confido, perchè so che la me vol ben, e la gh’averà da caro che anca mi sia logada.
