![]() |
Questa pagina è stata trascritta, formattata e riletta. | ![]() |
SIOR TODERO BRONTOLON | 439 |
Nicoletto. Lassa, lassa, che te vôi maridar?
Cecilia. Lassa, lassa, che te vôi maridar.
Nicoletto. Mo la sarave ben bella!
Cecilia. Gh’averessi gusto, Nicoletto?
Nicoletto. Mi sì, per diana. E vu gh’averessi gusto?
Cecilia. Oh! se savessi quanto ben che ve voggio!
Nicoletto. Varè, vedè, per cossa no me l’aveu mai ditto?
Cecilia. Perchè son una putta da ben, e le putte no le ha da parlar de ste cosse, co no le gh’ha speranza de maridarse.
Nicoletto. Adesso mo gh’averè speranza de maridarve.
Cecilia. Mi sì, vede: se ho da dirve la verità, gh’ho tanta fede che l’abbia da esser cussì.
Nicoletto. Oh, che cara Cecilia!
Cecilia. Cossa diseu? Oh! chi l’avesse mai ditto?
Nicoletto. Oh, che cara muggier! (le vuol toccare unia mano)
Cecilia. Via, sior sporco, tegnì le man a casa.
Nicoletto. Oh, se sè cattiva, mi no ve voggio.
Cecilia. Co sarà el so tempo, no sarò cattiva.
Nicoletto. Vien zente.
Cecilia. Oh poveretta mi!
Nicoletto. Eh! xe Gregorio.
Cecilia. Zitto, zitto.
SCENA V.
Gregorio e detti.
Gregorio. Nicoletto, andè da basso in mezzà, che el paron ve chiama.
Nicoletto. Vago, vago.
Cecilia. Oe, sentì: caro vu, no ghe disè gnente al paron che m’avè trovà qua. (a Gregorio)
- ↑ Lo stesso, che zitti, zitti, stiamo zitti.
- ↑ Leggesi come ben si sa, muci.