 |
Questa pagina è stata trascritta, formattata e riletta. | |
| 426 | ATTO PRIMO |
Marcolina. Che persona xela?
Fortunata. Eh! via, siora Marcolina.
Marcolina. Ah! furbacchiotta, veh! t’ho capio.
Fortunata. Se no fussimo avanzai come che semo, no me torave sta libertà.
Marcolina. Via, via, no xe sottoscritto el contratto, ma i xe promessi in parola; la lo fazza vegnir, che la xe patrona.
Fortunata. Lo chiamerò; intanto la fazza vegnir la putta.
Marcolina. La farò vegnir. Ma me par che voggia la convenienza, che el parla prima con mi.
Fortunata. Sì, sì, la gh’ha rason; dasseno la gh’ha rason. Adesso ghe digo alla donna, che la lo chiama. (s’accosta alla scena)
Marcolina. No crederave mai che mio missier fasse qualche scena. Veramente la xe vegnua siora Fortunata più presto che no credeva. Basta, son mi in te l’impegno, e nassa quel che sa nasser, la mia parola la gh’ha da valer.
Fortunata. La vederà, se el xe un putto de sesto.
Marcolina. I soia coss’ali ditto?
Fortunata. Oh! contentissimi. I xe fora de lori dalla contentezza.
Marcolina. Quando gh’ali intenzion de voler dar la manb?
Fortunata. Oh! credo mo che i gh’abbia gusto, che quel che s’ha da far, el se fazza presto.
Marcolina. Per mi, più presto che i fa, i me fa più servizio.
Fortunata. Velo qua, velo qua. Cossa disela?
Marcolina. Pulito, dasseno, el me piase.
Fortunata. Che el resta servido, sior Meneghetto.
SCENA IX.
Meneghetto e dette.
Meneghetto. Patrone mie riverite.
Marcolina. Serva umilissima.
Fortunata. Védela, sior zerman? Questa xe siora Marcolina, mare de siora Zanetta, che sarà la so sposa.
