 |
Questa pagina è stata trascritta, formattata e riletta. | |
| SIOR TODERO BRONTOLON | 421 |
Todero. Cossa diavolo feu? In cossa ve perdeu? No fe gnente.
Desiderio. La dise che no fazzo gnente? Me par de far qualcossa. Mi a Rialtoa, mi in Piazza, mi a Palazzo1, mi a scuoderb, mi a pagar...
Todero. Via, via; andemo drio fin domattina?
Desiderio. Mo, caro sior Todero....
Todero. Sior Todero, sior Todero! Una volta ve degnevi de dirme sior paron.
Desiderio. La compatissa; me par, secondo el bon ordene mercantil, che le incombenze che la m’ha onorà de darme...
Todero. Chi magna el mio pan, m’ha da respettar.
Desiderio. La m’ha onora de ametterme alla so tola2.
Todero. Ma mi son el paron.
Desiderio. L’ha avù anca la bontà de dirme, che semo un pochetto parenti.
Todero. Se fussimo anca parenti più de quel che semo, son paron, e voggio esser tratta da paron.
Desiderio. Benissimo. Da qua avanti ghe dirò sior paron.
Todero. Dove xe vostro fio?
Desiderio. In mezzà, che el copia le lettere.
Todero. Gh’alo voggia de far ben quel putto?
Desiderio. Mi me par de sì.
Todero. E mi ho paura de no.
Desiderio. Vizi nol ghe n’ha certo.
Todero. Se nol ghe n’ha, el ghe ne pol aver.
Desiderio. Mi no so cossa dir, mi noi lasso praticar con nissun.
Todero. Quanti anni gh’alo?
Desiderio. Disdott’anni.
Todero. Maridèloc.
Desiderio. Con che fondamento vorla che lo marida?
Todero. Lo mariderò mi.
