 |
Questa pagina è stata trascritta, formattata e riletta. | |
| SIOR TODERO BRONTOLON | 411 |
avanti i boa. Sentimo prima chi xe el partio, e po che daremo quella dota che se convegnirà.
Fortunata. Cossa gh’ala paura? Che ghe propona una persona ordenaria? Sala che sto putto che ghe propono, xe un fior, xe una coppa d'oro? Sala che in sto paese no ghe xe altrettanto? Sala che el xe un mio zermanb?
Marcolina. Oh caspita! so zerman?
Fortunata. Mo siora sì; cossa disela? Ghe xe eccezion?
Marcolina. Certo che col xe so parente, nol pol esser altro che una persona civil; ma, cara siora Fortunata, per esser un bon partio, ghe vol qualcossa de più.
Fortunata. Sala che el xe fio solo, che el gh’averà do boni mille ducati d’intrada, e che el gh’ha una carica in aspettativa? Sala che nol gh’ha un vizio al mondo, che el xe un putto che, no fazzo per dir, ma el gh’ha un’aria propriamente da zentilomo? Sala che el xe sior Meneghello Ramponzoli, fio de sior Massimo e de siora Scolastica Caramali?
Marcolina. Oh se la me ne dirà tante, ghe dirò siora sì; lo cognosso; son contenta; magari.
Fortunata. Mo! magari certo, magari.
Marcolina. Xelo informà de sta mia putta? Salo che merito che la gh’abbia? Salo che oracoloc che la xe?
Fortunata. Oh! el sa tutto.
Marcolina. Salo mo anca, che la xe una putta ben fatta? Che la xe un pometto de riosa1?
Fortunata. Vorla che ghe parla da amiga? El l’ha vista.
Marcolina. Come? Quando? Mia fia no pratica co nissun; in casa mia no ghe vien nissun. (riscaldandosi)
Fortunata. Via via, siora Marcolina, no la vaga in collera, che no ghe xe mal. El l’ha vista al balcon.
Marcolina. Sotto la zelusia?
Fortunata. Sotto la zelusia. E el l’ha vista anca fora de casa, una mattina a bonora.
- ↑ Bianca e colorita come una mela rosa.
