 |
Questa pagina è stata trascritta, formattata e riletta. | |
| 414 | ATTO QUARTO |
SCENA II.
Anzoletta e dette.
Catte. Baleremio anca nu?
Anzoletta. Pol darse un pochetin.
Betta. I darà anca da cena.
Anzoletta. Sì, ma nu no gh’intremo.
Betta. Quando che i dà da cena, qualcossa magneremo.
Catte. Mi me basta balar.
Anzoletta. E mi gh’ho el mio dileto
A véder a fenir un certo negozieto.
Quela certa signora che no se sa chi sia,
I dise che la sposa un de sta compagnia.
Mi me par impussibile; ghe vederemo el fin.
Catte. Donca per le so nozze i farà sto festin.
Anzoletta. Pol esser.
Betta. Sì, seguro, e co ghe xe novizzi,
No ghe mancherà certo nè torte, nè pastizzi.
SCENA III.
Giacometto e dette.
Catte. Patron.
Giacometto. Bondì, fia mia. (a Catte)
Betta. (Oe, no ghe disè gnente, che so muggier ghe sia.
La m’ha dito che tasa). (piano a Catte)
Giacometto. Coss’è? ghe parlè in rechia?
Betta. No ghe posso parlar?
Giacometto. Eh, vu se volpe vechia.
Betta. Vecchia a mi?
Giacometto. Non intendo de parlar de l’età;
Digo che sè una dona, che el fato soo lo sa.
Betta. Certo no son minchiona.
