 |
Questa pagina è stata trascritta, formattata e riletta. | |
| 380 | ATTO PRIMO |
El me compra dei fiori, squasi ogni festa un mazzo.
Betta. Vardè che gran cazzada1.
Catte. Cossa m’alo da dar?
Betta. Mi co fava l’amor, voleva da magnar.
Tuto me comodava, nose, pomi, zaletti2,
Ma co no i dava gnente, musoni maledetti.
Anzoletta. Mi mo son sempre stada de un’altra qualità;
Co ghe n’ho bu,3 ai morosi mi ghe n’ho sempre dà.
Mio sior pare all’ingrosso el fava provision,
E mi sempre qualcossa portava via in scondon.
M’arecordo una volta mia mare povereta
La m’ha trovà un persuto sconto soto la pieta4.
L’ha volesto saver... no so, mi m’ho confuso,
E la m’ha lassà andar una man in tel muso.
Betta. Oh, a mi mo per ste cosse, ve zuro in verità,
Che da mia siora mare no me xe mai sta dà.
In casa mia, sorela, no ghe xe stà vadagni.
Ma non ho mai volesto de quei che scalda i scagni.
Catte. Oe, vardè un’altra gondola.
Betta. No i ha fenio gnancora?
Anzoletta. No ghe xe miga un omo. Gh’è drento una signora.
SCENA VII.
Arriva un altra gondola, da dove sbarca siora Tonina.
Betta. Patrona.
Tonina. Saveu dove che sia
La casa, dove ancuo se magna in compagnia?
Anzoletta. Siora sì. La xe quela; ma no se pol andar.
