Pagina:Goldoni - Opere complete, Venezia 1913, XVI.djvu/124

118

ATTO PRIMO

Felice. Mio mario xe un bel matto? Brava, sè ben curiosa.

Tonina. Digo cussì per dir. Zela fursi zelosa?
Felice. Se poderave dar, che avesse zelusia
De qualche altro soggetto, ma de vu no, fia mia.
Tonina. Certo che de mi no, perchè se sa chi son;
Da resto...
Felice.   El vederessimo cascar a tombolon.
Tonina. Ghe n’è casca dei altri.
Felice.   Dasseno.
Tonina.   Sì dasseno.
Felice. Vardè. Dalla paura mi stassera no ceno.
Tonina. La burla a pian, patrona; se fusse una de quelle....
Da sior Zanetto Trigoli ghe n’ho sentio de belle.
Felice. Cara vu, feme rider.
Tonina.   Songio la so buffona?
Felice. Propriamente ve godo.
Tonina.   Ghe ’l dirò alla parona.

SCENA V.

Siora Marinetta e dette.

Marinetta. Cossa xe sta, Tonina?

Tonina.   Gnente.
Felice.   Ve dirò mi.
Tonina. Via, no la fazza scene.
Felice.   La m’ha dito cussì,
Che Nane mio mario...
Tonina.   Che bisogno ghe xe?
Marinetta. Via, parlè con rispetto, e no ve imusonè¹.
Deghe a Beppo sta lettera, e che el la porta presto
Da quello dalle acque² all’insegna del cesto.
Tonina. Siora sì. (ingrugnada)

1. Non fate il grugno: Patriarchi e Boerio. Vol. II. 202 e 239.
2. Botteghe da acque (agghiacciate) dicevansi le botteghe da caffè.