Orsola. Sior sì.
(leva il bastone a Zorzetto)
Cavaliere. Che diavol di vergogna!
Sempre sempre gridar con questo e quello?
Maledetto campiello!
Lucietta. Mi no crio co nissun.
Orsola. No parlo mai.
Cate. No la se sente gnanca la mia puta.
Pasqua. I ghe dise la muta.
Lucietta. Mo vu...
Gnese. Mo vu, patrone...
Lucietta. Cossa voressi dir?
Cavaliere. Ma siate buone.
Domani io vado via,
E se la compagnia torna serena,
Meco venete a divertirvi a cena.
Cate. Per mi, no son in collera.
Pasqua. Pute, coss’alo dito?
Orsola. No sentì?
El n’ha dito cussì,
Che se tornemo in pase,
Ceneremo con elo.
Pasqua. Sì, fia mia;
Mi no desgusto mai la compagnia.
Cavaliere. Bravissime le vecchie.
Orsola. Oe Lucietta,
Gh’astu gnente con mi?
Lucietta. Semio amighe?
Orsola. Tiò un baso.
Lucietta. Tiò anca ti.
Gnese, ti cossa distu?
Gnese. Per mi, taso.
Pasqua. Oe, donna Cate.
Cate. Donna Pasqua.
| Pasqua. |
 |
Un baso. (si baciano)
|
| Cate.
|
