Che no ghe xe pericolo,
Che te manca mario. (piangendo)
Anzoletto. Deme l’anello indrio. (a Lucietta)
Lucietta. Questo po no. (piangendo)
Cate. Volè l’anelo indrio? Ve lo darò.
(va per levar l’anello a Lucietta)
Lucietta. Lassème star, siora. (piangendo)
Cate. Furbazza!
Damelo quell’anello.
Lucietta. No vel dago
Gnanca se me coppè.
Cate. El te tratta cussì,
E ti el tioressi ancora?
Lucietta. El voggio, siora sì. (piangendo)
Cate. Oh, ti meriteressi
Che el te copasse.
Anzoletto. Sentì,
T’ho dà, perchè te voggio ben. (singhiozzando)
Lucietta. Nol soggio?
Cate. El xe un baron.
Lucietta. No me n’importa, el voggio.
Cate. Tocco de desgrazià.
Anzoletto. Via, se sè donna,
Cara siora madonna,
Compatime anca mi.
Gnese. (Mi nol torave.
Gh’averave paura.) (da sè)
Cate. Cussì se tratta co la mia creatura?
Anzoletto. Via, andemo. No ti vien? (a Lucietta)
Lucietta. Baron, me vustu ben?
Cate. No stemo qua, che la xe una vergogna.
Anzoletto. Causa quella carogna de Zorzetto.
Gnese. Oe, oe, come parleu, sior Anzoletto?
Anzoletto. Parlo cussì, e diseghelo.
Lucietta. Via, strambo.
