Orsola. Oe disè, donna Pasqua; donna Pasqua.
La xe sordetta, grama!
Oe sentì, donna Pasqua.
Pasqua. Chi me chiama?
Orsola. Za che gh’ave la scoa, feme un servizio,
Dene una nettadina
Qua davanti de nu.
Pasqua. Quello che fazzo mi, felo anca vu. (spazza sul suo)
Orsola. No ve faressi mal, cara madonna.
Pasqua. (Vardè che zentildonna!) (da sè)
Orsola. El xe un pan che se impresta.
Pasqua. (La vol che se ghe fazza la massera.
Chi credela che sia sta frittolera?) (da sè)
Orsola. Slongar la scoa un tantin
Xela una gran fadiga?
Pasqua. Cossa? (No sento ben quel che la diga.) (da sè)
Orsola. Digo cussì, sorella, che a sto mondo
Quel che servizio fa, servizio aspetta.
Pasqua. Che servizio?
Orsola. Sè sorda, poveretta.
Pasqua. Mi sorda? Sta mattina
Ghe sentiva pulito.
Una flussion se m’ha calà za un poco;
Ma credo che sia causa sto siroco.
Orsola. Disè, Pasqua, sentì.
Pasqua. Cossa voleu da mi? (s’accosta)
Orsola. Me seu amiga?
Pasqua. Sì ben, no fazzo miga
Per no voler scoar la vostra porta;
Per vu no me n’importa;
Ma no vôi che ste frasche, che sta qua,
Le me diga massera
Della comunità.
Orsola. Via, via, gh’avè razon; disè, fia mia.
Dove xe vostra fia?
