Anzola. Cossa mai v’oggio fatto?
Isidoro. Donna aver cognossù.
Anzola. Via, no parlemo altro, za che la xe fenia.
Pensemo a far sta nozze in pase e in allegria.
In presenza de tutti la man torneve a dar.
Tonino. Via, vegnì qua, Checchina.
Checca. No me fazzo pregar.
Tonino. Tolè la man; ve sposo in presenza de tutti.
Checca. Oh caro el mio Tonin.
Anzola. Cari, cari quei putti.
Seu contento, sior Gasparo, che la sia maridada?
Gasparo. Mi sì, son contentissimo.
Anzola. Vedeu? mi l’ho logada.
Me lodeu, sior compare?
Benetto. No se pol far de manco.
Anzola. (Cussì gh’avemo in casa un desturbo de manco).
Seu contenta, Checchina?
Checca. Mi sì, mi sì, dasseno.
Bastiana. Sta sera femio nozze?
Checca. Mi sta sera no ceno.
Anzola. Vôi che femo pulito, ma che spendemo poco.
Che chi butta via el soo, fa figura de aloco.
Faremo una cenetta in piccolo da nu.
Sior compare Benetto, sto onor fevelo vu.
Benetto. Comandè, cara fia.
Anzola. No vôi torte e pastizzi,
Qualcossa che desmissia el cuor de sti novizzi.
Sentì, cugnada cara, la scuola che ve dago,
E po la vostra camera a parecchiar ve vago.
Se da putta sè stada bona e savia con nu,
Procure col mario de farve ancora più.
Gasparo. A pian un pochettin su sto ponto, sorella;
Siè bona col mario, come che la xe ella.
Anzola. Via tasè là, sior sempio, che ve responderò.
Gasparo. Sentiu che bona grazia?
