 |
Questa pagina è stata trascritta, formattata e riletta. | |
| 498 | ATTO TERZO |
Presto, presto tornar. Sento mio cuor gran doggia.
(guarda Checchina patetico, e parte)
SCENA VII.
Angiola, Betta e Checca.
Anzola. Gnente. Voleu rider? El xe
Innamorà de Checca.
Betta. Eh via. (rìdendo)
Checca. Mo ben, ridè.
Anzola. E savè che Checchina no la vol Levantini.
Checca. Mi no digo de tutti. Ghe n’è de paregini1.
Certo che se dovesse sposar quella fegura,
Con quei brutti mustacchi el me faria paura.
Betta. Tonin no gh’ha mustacchi.
Checca. Diseme, cara vu,
Tonin xe da Levante?
Betta. El xe nato a Corfù.
Anzola. Lo toressi quel putto? Via, no me respondè?
Ve piaselo Tonin? Cossa gh’aveu? pianzè?
Mi no so, se ste lagreme diga de sì, o de no.
Lo toressi Tonin?
Checca. Siora sì che el torrò. (piangendo)
Betta. Tolè, el xe vegnù qua a portarghe l’anello,
E ha bisognà che el scampa.
Checca. Oimei! mo dove xelo?
Betta. Chi sa dove el s’ha sconto; chi sa dove el xe andà?
Anzola. Dove xe andà Bastiana? Con ela el tornerà.
Checca. Chi sa quando la vien?
Anzola. Via, via, no fè sussurro.
Checca. Mi debotto... la testa me darave in tel muro.
- ↑ Ganimedi, zerbini: Boerio.
