 |
Questa pagina è stata trascritta, formattata e riletta. | |
| LE DONNE DE CASA SOA | 479 |
Tonino. La difficoltà è questa, no gh’ho bezzi in scarsella1.
Betta. Eh, Bastiana ve crede; la ve lo fiderà.
Ghe li dare po i bezzi.
Bastiana. Siora no, in verità.
No la xe roba mia, no la posso fidar.
Betta. No gh’avè bezzi adosso? Cosse avemio da far?
Tonino. Mio barba me tien curto.
Betta. E pur se poderia...
Femo cussì, sior’Anzola, feghe la piezaria.
Anzola. Mi no ghe voggio intrar. Fèghela vu. (a Betta)
Betta. Mi no.
Tonino. Che la tegna l’anello; co poderò, el torrò.
Betta. No, in sta sorte de cosse bisogna destrigarse.
Tonino. Cossa voleu che fazza?
Betta. Bisognerà inzegnarse.
Credito no gh’avè per cussì poco in piazza?
No troverè un amigo che un servizio ve fazza?
Chi è? (verso la scena)
Anzola. Oh, xe qua sior Benetto.
Betta. Ch’el vegna.
Anzola. Vago via.
Betta. Non abbiè tanta pressa; aspettè, cara fia.
SCENA V.
Benetto e detti.
Betta. Patron.
Anzola. Tanto se sta?
Benetto. Compatì, no ho podesto destrigarme.
Anzola. Mo za.
Sempre cussì; el m’impianta.
Betta. (Aspettè). (a Anzola) Sior Benetto,
Diseme: a un galantomo faressi un servizietto?
- ↑ Così il verso in tutte le edizioni.
