 |
Questa pagina è stata trascritta, formattata e riletta. | |
| LE DONNE DE CASA SOA | 475 |
SCENA IV.
Bastiana, Tonino e dette.
Betta. Mo che el resta servido.
Tonino. Ghe son servo.
Anzola. Patron.
Tonino. La perdona l’ardir...
Betta. Anzi la me fa onor.
Che la resti servida.
Anzola. Chi xelo sto signor?1 (a Bastiona)
Bastiana. Un zovene marcante, che gh’ha anca dell’intrada.
Tonino. (Xela questa de Checca?...) (piano a Bastiona)
Bastiana. (Sì, la xe so cugnada).
(piano a Tonino)
Betta. Oe, cossa gh’alo nome, Bastiana?
Bastiana. Sior Tonin.
Anzola. Venezian?
Tonino. Siora no; son nato Levantin.
Dirò per mia desgrazia, perchè per sta rason
In fazza sta mattina m’è stà serrà un balcon.
Betta. Poveretto! dasseno?
Anzola. Chi è sta sto bell’umor?
Tonino. Siora Checca.
Betta. Ste cosse le se fa per amor.
I xe de quei despetti che sol far le morose,
Quando che le xe in collera, quando le xe zelose.
Quando no se ghe pensa, no se serra i balconi.
Sior Tonin, consoleve, che vu sarè dei boni.
Anzola. La sarave una putta d’umor ben stravagante,
Se la sprezzasse un putto per esser da Levante.
Bastiana. E un putto de sta sorte, ricco, fio solo e bon.
Certo ghe ne xe poche de ste bone occasion.
Anzola. Se vorlo maridar?
- ↑ Zatta: Chi xelo mo sto sior?
