Pagina:Goldoni - Opere complete, Venezia 1911, XII.djvu/480

474 ATTO TERZO
De vegnir vecchie presto, de far brutta figura.

Le ha gusto de sentirse a dir che le xe in ton;
Co le gh’ha della carne, ghe par de parer bon.1
Ma pò, co i fioi xe grandi, no i gh’ha gnente de amor;
La mare se destruze da rabbia e da dolor.
Onde xe meggio sempre lattarli da so posta.
Cossa diseu, Bettina?
Betta.   Qua no ghe xe risposta.
Ma zonzèghe2 de più, che co sta bella usanza
I fioli i torna a casa senza un fià3 de creanza.
E non occorre a dir i xe da latte ancora;
Bisogna certe cose imprimerle a bonora.
Se no, quando a principio no se se tol sta briga,
Credemelo che dopo se fa doppia fadiga.
Anzola. Basta, per mi so certo che co ghe ne averò,
Fora delle mie man i mi fioi no i darò.
E se le sarà putte, oh, ve dago parola.
Che le mie putte, certo, mi no le mando a scuola.
Betta. Perchè mandarle a scuola? A lezer, a laorar,
A casa co so mare no le pol imparar?
Ma xe che al dì d’ancuo le mare no le vuol
Tenderghe a le so putte, e in fatti no le pol;
Perchè co le ha d’andar a spasso tutto el zorno,
Sti intrighi le procura levarseli d’attorno.
Anzola. Certo, e le lassa a casa tutta quanta la sera
Le putte grande e grosse in man d’una massera.
E po? e po, gramazze! le sbrissa4, e po le intoppa.
Mare senza giudizio! Un maggio5 su la coppa.
Betta. Zitto, xe qua Bastiana.
Anzola.   Ghe xelo el putto?
Betta.   Sì.
Anzola. Oe! che femo pulito.
Betta.   Sì, lassè far a mi.

  1. Comparir belle.
  2. Aggiungete.
  3. Un pochino. Fià, fiato, alito: v. Patriarchi e Boerio.
  4. Scivolano.
  5. Maglio.