Gasparo. Fè assae; ma meggio ancora
Paressi, se no fussi con mi tanto dottora.
Anzola. Sentì come che el parla? Dottora me disè?
Vostra muggier dottora? Che strambazzo che sè!
Gasparo. Voleu che ve la diga... (alzando la voce)
Anzola. Oh, ve la digo mi:
(alzando la voce)
Che da qua avanti certo no l’ha da andar cussì.
Benetto. Coss’è, cossa xe sta? (s’alza e va in mezzo ai due)
Anzola. El m’ha dito dottora.
Gasparo. Mo se la dise cosse...
Anzola. Mo tasè là, in bon’ora.
(a Gasparo)
Sempre el vol parlar elo.
Gasparo. Tolè suso. (a Benetto)
Benetto. Mo via...
(a Anzola)
Anzola. No, caro sior; lasseme... (a Benetto)
Benetto. Quieteve, cara fia.
Gasparo. Mo vedeu, sior compare? Sempre la xe cussì.
Nu se volemo ben, e se cria tutto el dì.
Benetto. Le xe cosse da gnente; mia comare vorria...
(a Gasparo)
Anzola. Vorave esser parona un dì de casa mia;
E se no destrighè vostra siora sorella,
Un dì, sior Gasparetto, mi ve la fazzo bella.
Benetto. Bisogna destrigarla... (a Gasparo)
Gasparo. Mo coss’oggio da far?
In cerca de mario l’oggio mi da menar?
Anzola. Sentì che bel parlar da zovene prudente;
E po no i vol che diga che nol xe bon da gnente.
Vardè che gran fazzenda! Oh povero gramazzo!
Lassème far a mi, e vederè se fazzo.
Gasparo. Mo fè, mo fè in bon’ora. L’autorità gh’avè
De far e de desfar tutto quel che volè.
