Bastiana. De maridar sta putta no ve par che sia ora?
Volè sto intrigo in casa? maridèla in bonora.
Betta. Ghe lo digo anca mi. Cussì no la sta ben.
Anzola. Cossa voleu che fazza, se l'occasion no vien?
Bastiana. Perchè, sior’Anzoletta, no dir qualcossa a mi,
Che ghe trova un novizzo? Che ghel trova? anca sì.
Anzola. Trovarlo stimo el manco, no l’è zotta, ne goba;
Trovar stimo chi torla volesse senza roba.
Bastiana. Gh’ho una bona occasion d’un zovene marcante,
Che fina da putello xe vegnù da Levante.
Nol gh’ha pare, ne mare, el sta con un so barba1;
El xe bon, el xe ricco, e nol gh'ha pelo in barba.
El se vol maridar; el barba no vorria,
Perchè credo ch’el voggia menarselo in Turchia.
E a dirvela, per gnente mi no son vegnua qua;
L’ha visto siora Checca, e el se gh’ha innamorà.
Anzola. Dasseno?
Bastiana. Sì dasseno.
Betta. Oe, se el dise da bon.
No fè, sior’Anzoletta, che scampa sta occasion.
Anzola. Se el la vol senza gnente, mi ghe la dago adesso.
Bastiana. Cossa dirà sior Gasparo?
Anzola. Eh, mio mario xe un lesso2.
No ghe lo digo gnanca. De lu me comprometto;
Me basta che aspettemo che vegna sior Benetto.
Lu xe quel che tien dretta la barca in sta fameggia;
E no resolvo gnente, se lu no me conseggia.
Betta. Brava, sior’Anzoletta; giusto cussì anca mi
Fazzo co sior Maffìo. El vien là tutto el dì,
E se noi fusse elo, povero galantomo...
Per certi servizietti mio mario ne xe omo.
Lu scuode, lu provede, lu me fa da fattor.
La xe una bella cossa un amigo de cuor.
- ↑ Zio.
- ↑ Allesso. Omo lesso, uomo pigro, mogio ecc.: Boerio.
