Pagina:Goldoni - Opere complete, Venezia 1911, XII.djvu/444

438

ATTO PRIMO

Betta. Ei seo dei candelieri lo vorressi per vu?

Laura. Siora sì, le xe cosse che le ne tocca a nu.
Betta. Se el seo del candelier toccasse alla massera¹,
Faressi descolar sie candele alla sera.
No, no, gnanca da mi no ghe xe incerti, fia.
Laura. (La xe una rampignona² compagna della mia). (da sè)

SCENA IV.

Angiola e dette.

Anzola. Ande là, ghe n’ho messo una bona impoletta³;

No lo stè a dezipar⁴. (a Laura)
Laura.   Vorla che me lo petta?
Anzola. No respondè cussì, saveu, donna strambazza,
Vecchia senza giudizio.
Laura.   Sempre la me strapazza. (parte)

SCENA V.

Angiola e Betta.

Anzola. Co custìa, siora Betta, no se pol viver più.

Betta. Da che paese xela?
Anzola.   De casa de colù⁵.
No l’è bona da gnente. Tutto el zorno se cria.
Mezzo ducato⁶ al mese proprio lo butto via.
Betta. Cara siora Anzoletta, mo no savè, che chi
Più spende, manco spende? A quella che gh’ho mi,
Ghe dago cinque lire⁷; ma la xe una massera,
Che fa dalla mattina fina mai alla sera.
Anzola. Ma mi ho da mesurar la spesa coll’intrada.
Se savessi che aggravio, che me xe mia cugnada!

1. Serva di casa.
2. «Truffona»; così spiega F. Cameroni nelle note alle Donne d. c. s., nel v. II dei Capolavori di C. G., Trieste, Coen. 1858.
3. Piccola ampolla.
4. «Sciupare»: F. Cameroni, l. c.
5. Cioè del diavolo»: Cameroni.
6. Si ricordi che il ducato d’argento equivaleva a otto lire venete, pari a lire italiane 4,368.
7. Lira veneta pari a lire italiane 0,546.