Costanza. Mo da ancuo a domattina, che premura ghe xe?
Dorotea. Me premeria d’averlo, anca mi so el perchè.
Costanza. (La gh’ha troppa premura, me par de veder scuro). (da sè)
Dorotea. (Se se trova el patron, mi lo perdo seguro). (da se)
Costanza. Ala disnà?
Dorotea. Mi no. Zanetta è andada via;
Gnanca cenere calda no credo che ghe sia.
Costanza. Vorla restar servida?
Dorotea. De sto anello parlemo.
Costanza. La magna un bocconcin, che po discorreremo.
Via, deghe una possada: portèghe un tovaggiol.
Dorotea. (Veramente gh’ho fame). (da sè)
Costanza. La magna, se la vol.
Dorotea. Via, per no refudar, magnerò un bocconcin.
Ma son de poco pasto. Gh’oggio dà el so zecchin?
Costanza. Oh sì, la me l’ha dà.
Dorotea. O caro quel cavallo! (mangiando)
El me l’ha dà sie volte. Co lo metto, no fallo.
Oh che bona manestra!
Costanza. (La se porta pulito!) (da sè)
Dorotea. E ela no la magnà. (mangiando bene)
Costanza. No gh’ho troppo appetito.
Dorotea. Bon sto piatto, dasseno.
Costanza. Ho gusto che el ghe piasa.
Dorotea. Cussì torno a Redutto, senza tornar a casa.
Costanza. (A vederla a magnar, me vien voggia anca mi
Quanto che pagaria poder magnar cussì). (da sè)
Dorotea. Da béver.
Titta. Vorla piccolo? o vorla...
Dorotea. Grosso, grosso.
Voggio andar a Redutto con del calor adosso.
Costanza. Sè alliegra, e no ghe xe vostro mario con vu?
Dorotea. Cossa m’importa a mi, se nol tornasse più?
Za ogni settimana gh’ho lettere alla posta;
Quando che gh’ho dei bezzi, stago ben da mia posta.
