 |
Questa pagina è stata trascritta, formattata e riletta. | |
| 148 | ATTO SECONDO |
Dorotea. Tasi per carità.
Zanetta. (Ih ih, furia franzese). (da sè)
Dorotea. (No la vôi sopportar). (da sè)
Zanetta. (Mi lasso che la cria: me vago a inmascherar).
(da sè, e parte)
SCENA V.
Dorotea e Meneghina.
No la tegno custìa gnanca se la me paga). (da sè)
Meneghina. Lustrissima...
Dorotea. (Ste serve le xe all’ultima moda). (da sè)
Meneghina. Oi da tornar1 a casa colla pignatta voda?
Dorotea. Diseme, Meneghina, sten ben dove che se?
Meneghina. Se sta ben co se magna; ma adesso no ghe n’è.
Dorotea. Almanco in casa mia le gh’ha quel che le vol.
Quando le vol magnar, le va, le se ne tol.
Bon pan, bon vin, de tutto ghe xe per ordenario.
Quanto la to parona te dala de salario?
Meneghina. Otto ducati all’anno2.
Dorotea. Otto? e da mi culia
Dodese la ghe n’ha, e sì li butto via.
Vustu vegnir con mi? diese te ne darò;
E ti magnerà ben.
Meneghina. Mi sì che vegnirò.
Dorotea. Mi no te darò parte de pan, de vin, de gnente.
Acciò no te la magna l’amiga o la parente.
Magna fin che ti vol; disna, cena, marenda.
Ma no vôi che se dona, ma no vôi che se venda.
Meneghina. Per mi no gh’ho nissun; no ghe xe sto pericolo,
Magno poco, e me piase de bever el vin piccolo.
